將軍澳發展迅速,唔少樓盤都係背靠鐵路,加上完備既生活圈,但係亦有部份講求環境設計既樓盤,以清靜同景觀吸引買家,今次介紹既清水灣半島,係將軍澳鬧市既世界桃園。
清水灣半島座落環保大道旁,由新鴻基發展,屋苑由7座物業組成,樓高40-59層,提供1959伙單位,開層由兩房到四房都有,單位面積由600幾到過千呎都有,而車位有803個,比例接近2:1,方便有車人士。清水灣半島景觀開揚,可以望百勝角山景同埋東區海景,吸引想換海景樓既買家。
雖然屋苑唔近港鐵站,但係勝在有小巴,而且班次頻密,去坑口站只係需要5分鐘,同時有唔少特別班次巴士,方便上班一族。同時係796C巴士總站,去蘇屋途經九龍多個站。
清水灣半島位處95校網,有超過22間小學可供住戶子女入讀,當中部份深受區內家長歡迎,好似保良局陸慶濤小學、將軍澳天主教小學、宣基小學。中學亦都有唔少具備優良質素,好似迦密主恩中學、宣基中學同將軍澳官立中學,都係區內傳統名校。同時亦都有多間國際學校落成,好似香港思貝禮學校、法國國際學校,都係將軍澳區既國際學校,為住戶子女,提供更多唔同既教育選擇。
雖然屋苑無大型商場,但搭五分鐘車去坑口,東港城設大型商場,有各類型商舖、超市、食肆,近年加入日式百貨,同時假日喺商場經常有特別活動,人流旺。附近厚德邨、明德邨商場,林林總總既購物選擇都有,街市翻新之後,行得更加舒適。如果想試下特色美食,坑口村一定唔會令你失望。