有大型商場、鐵路、恆河沙數一樣既巴士線，仲有駁腳小巴，良好學校網，完善既社區配套，以為我講緊豪宅，唔係，我講緊係居屋，正如著名足球評述員黃興桂既金句，庶渣價錢，燒鵝味道。
龍蟠苑1987年入伙，屋苑由7座物業組成，合共3680伙，面積由300幾到600幾呎，開則由一房到3房都有，而且車位充足，有車住戶唔駛為車位煩惱。
屋苑設有商場，提供酒樓，餐廳，超市等小型民生店舖。而鄰近的荷里活廣場係區內最大型商場，服裝、食肆、超市一應俱全。要買民生用品同大型街市，可以去雙鳳街或者鳳德邨都有唔同俾選擇，總有貨品合你心水。
另外，屋苑附近有斧山道公園及蒲崗村道公園，為住戶提供綠化空間，而鄰近有斧山道運動場及游泳池，可以俾住戶有唔同既消閒活動選擇。
龍蟠苑屬於45小學校網，有唔少學校可以選擇，蒲崗村道既學校邨，有聖博德天主教、嗇色園主辦可立小學、慈雲山天主教等等。中學屬於黃大仙區，保良局第一張永慶中學、保良局何蔭棠中學，以及協和書院，都係區內既名校。
講到交通，龍蟠苑可以話係東九龍其中一個最佳地區。港鐵去東九龍同過海都方便，同時亦都係沙中線途經站，絕對有再升值潛力。荷里活廣場設有大型巴士總站，港九各區都方便，入新界更加係大老山隧道出口，一站就到新界。